Charter Document - 02220422
| Charter Number: | 02220422 |
|---|---|
| Cartulary Title: | Cartulaire de Hugues de Chalon (1220-1319) |
| Charter Language: | French |
| Charter Origin: | Lay |
| Charter Type(s): | Confirmation |
| Date: | 1286 |
| Date type: | Internal |
| Resource Link(s): |
Patrimoine numérisé de Besançon - MS Droz 21 - Tome 1 (p.1031) |
Charter:
Sachent tuit cil qui verront et orront ceste presente lettre que li nobles Jehans de Chalon sires d'Allay et Jehans de Jouz sires de Cologney ont acordablement et de bone memoire fait eschange perpetuelment et senz nul reclain en tel meniere que lidiz nobles Jehans de Chalon sires d'Allay a quitté et outroié permaignablement adit Jehan signour de Collogney Humbert dit Pelletier de Dummartin son home et tout son mex et Jehannete la fille Richart de Chaffoy et son mex et lidiz Jehans de Jour sires de Collogney a quitté et outroié permagnablement adit noble Jehan de Chalon signour d'Allay Escuchar de Livier son home et ses enfant et tout le mex qu'il ont en la vile et ou terretoire de Livier Et ont encovent li uns à l'autre à bone foy garantir et appasier ledit eschange douquel li uns a envesti l'autre contre toutes genz tanque à loial tenure En tesmoignaige de laquel chose lidiz Jehans de Chalon sires d'Allay et lidiz Jehans de Jou sires de Colloney ont mis lour seaux pendant en ceste lettre faite et donée en l'an dou miliaire corrant par mil CC quatre vint et six ou mois d'octembre