Charter Document - 02220420

Je Richars de La Baume sires de Ceys fais savoir à touz que j'ay vendu quitté et baillié de mon bon gré et en ma bone memoire à noble baron Jehan conte de Bourgoigne et signour de Salins les cinc parties de la moitié de tout le puy de Monmaour laquel moitié est toute devise en sept parties et quelque autre droit que je avoie ou devoie avoir oudit puy de Monmaour pour CC livres d'estevenens lesquex je ay heu et receu doudit conte plenierement en deniers nombré Et est à savoir que je ay promis loialment et à bone foy par stipulacion sollempnel adit conte que je contre ladite vendue ne vanray par moy ne par autruy ne consentiray à mon pooir que autres y viegne et que je lesdites cinc parties garantiray adit conte et à ses hoirs à droit contre toutes genz Après je ay promis par ma foy adit conte faire et avoir maison avenant pour moy et pour les miens à touzjours ou chestel de Monmaour et ay gurpi tout droit escrist et non escript et toute costume et toute exception qui moy ou es miens porroient aidier ne valoir à venir contre ladite vendue et contre lesdites covenances En tesmoingnaige de ceste chose à ma priere et à ma requeste li chapitres de Saint Anathoile de Salins a mis son seal pendant en ces presentes lettres ensamble le mien seal Ce fut fait en l'an de l'incarnacion Nostre Signour qui corroit per mil CC sexante et doux l'endemain de Noel