Charter Document - 02220419
| Charter Number: | 02220419 |
|---|---|
| Cartulary Title: | Cartulaire de Hugues de Chalon (1220-1319) |
| Charter Language: | French |
| Charter Origin: | Lay |
| Charter Type(s): | Confirmation |
| Date: | 1275 |
| Date type: | Internal |
| Resource Link(s): |
Patrimoine numérisé de Besançon - MS Droz 21 - Tome 1 (p.1026) |
Charter:
Je Guyz chevaliers de Meges fais savoir à touz que j'ay vendu et outroié permaignablement pour moy et pour les miens à la noble dame Lore fame çay en arriers le noble baron Jehan conte de Bourgoigne et signour de Salins toutes les quereles et toutes les actions que je avoie ne pooie avoir à Perret dit Golart des Communailles et est à savoir en heritaiges en prel en champs en chasaux en maisons en gagieres en muebles et non muebles pour quinze livres de viennois que la dame dessus nommée m'a paié en bons deniers nombré pour la vendue dessus nommée Et doit tenir en bone pax la dame dessus nommée toute la terre et toute la possession que lidiz Galart tenoit devant ce que il fut partiz de mon frere et la quarte partie dou clous qui est assise en Communailles devant la maison à Prevoire dou Bois et ay covent per ma foy corporelment [donnée] garantir toutes les choses dessus nommées à la dame dessus nommée En tesmoignaige de laquel chose j'ay mis mon seal pendant en ces lettres Ce fut fait l'an mil CC septante et cinc ou mois de juin