Charter Document - 02220417

Nous officialx de la court de Besençon faisons savoir que nobles hons messires Jehans de Vienne chevaliers sires de Mirebel en montaigne non mie deceu non mie contraint à ce mais de sa bone volunté et de son bon gré et regardant et considerant son grant profit en ce pour luy et pour ses hoirs vent baille ou auxi quitte et delivre perpetuelment et confesse en droit et en jugement qu'il a vendu baillié ou auxi quitté et delivré heritablement à noble baron mons Jehan de Chalon signour d'Arlay et à ses hoirs les choses que ci ensuignent c'est à savoir le chestel de Chestoillon en montaigne près de la riviere de Hayn et les apartenances d'ycelui c'est à savoir le bourc doudit chesteal Curtene Vevy demi l'abergement d'Uselle liquex part à signour de Clerevaux les molins de Watepy et tel droit que lidiz Jehans de Vienne ha en la garde de Bonleu et toutes les appendises doudit chestel et desdiz leus et toutes les apartenances et touz les droit apartenant audit chestel de Chestoillon et esdiz leus en fié rerefiez en baronies en signories en justises en bois en aigues en decors d'aigues en pescheries en demenures en estanc en prey en chans en corvées en rentes en censes en tailles en prises en homes en femmes en gardes en belles gardes et en toutes autres choses coment qu'eles soient nommées senz rien retenir adit Jehan de Vienne ne es suens excepté le droit que lidit Jehan de Vienne ha à Poyte à Bley à Ylai et le fié de Cogny que ne soit mie de la vendue dessusdite Et ceste vendue a fait lidiz Jehan de Vihenne audit Jehan de Chalon et à ses hoirs des choses dessusdites pour le pris de quatorze mil et nuef cens livres de bons estevenens laquel somme d'argent lidiz Jehans de Vihenne confesse et publiement recognost que il ha eu et receu entierement doudit Jehan de Chalon signour d'Allay en deniers bien et loialment nombré et qu'il s'en tien pour bien paié Desquex choses devantdites vendues et de une chescune per soy lidiz Jehans de Vihenne s'est devestiz pour luy et pour ses hoirs et lidit monsignour Jehan de Chalon pour lui et pour ses hoirs en a envesti et mis en veraye pure et corporel possession senz riens retenir pour luy ou pour les siens et le promet defendre especialment contre son amé frere et signour mons Phelippe de Vihenne signour de Paigney si riens y voloit demander por raison de fié ou de rierefié ou de autre raison quel qu'elle fust Encor est à savoir que li chesteal de Chestoillon dessus nommé et li chestel de Mirebel en montaigne et li habitanz de cesdiz leus et des apartenances sunt et doivent estre de un cri pour deffendre l'un l'autre et lour terre Encor a promis et promet lidiz Jehans de Vihenne par son soirement devant doné audit mons Jehan de Chalon solempnement stipulant que il fera procurera et porchacera que noble dame dame Contesse de Geneve sa fame pour li et pour ses hoirs louera ratiffiera et approuvera la vendue et les convenances dessusdites En tesmoignaige de laquel chose nous officiaux devantdit à la proiere doudit Jehan de Vihenne fait à nous par nostre comandement avons mis le seal de la court de Besençon en ces lettres ensamble le seal doudit messire Jehan de Vihenne Faites et donées le mecredi devant la resurrection Nostre Signour l'an d'iceluy corrant per mil CC nonante et huit