Charter Document - 02220415

Nous Estevenins chestelain de Noseroy et Juliaine sa fame faisons savoir à touz que nous en saine memoire par bon consoil et por nostre grant profit avons vendu permaignablement à noble baron mons Jehan de Chalon signour d'Allay qui est nostre sire et à sire Hugues son frere chenoine de Lion pour sex vinz livres d'estevenens bons et leaux paiés à nous entierement en pecune nombrée de part lesdiz dous freres et mises en nostre profit le tout quanque nous aviens et poiens et deviens avoir es diemes de tout le val de Meges et trente jornaux de terre arable ou terretoire de la vile de Meges c'est à savoir douze jornaux ou champ que on dit ou Pomier liquex sunt d'une part tochant à champ le Maignin et d'autre part à champ à Sordet et quinze jornaux entre prey Ligar et la ville de Meges et trois jornaux en un leu que l'on dit les Acingnes entre le champ Jaquete et le cham es enfant Ragot et sep septures de pré à la culée de Seelot et le plus quanque nous y poiens et deviens avoir seanz entre les aigues et ladite culée de Seelot En tesmoignaige de laquel chose nous avons proié et requis les religious homes l'abbé de Balerne et l'abbé dou Mont Sainte Marie qu'il metent lour seaux en ces lettres Faites en l'an Nostre Signour mil CC octante et doux ou mois de mars