Charter Document - 02220414

Je Perrins fiz çay en arriers mons Pierre chevalier çay en arriers maour de Besençon fais savoir à touz que con mes amez et chiers sires messires Jehan de Chalon sires d'Allay m'ait doné en acressement dou fié que je tieng de luy cenz livrées de terre que il m'a assises en sa rente dou pois de Salins et en sa terre dou vaul de Nan ce que il havoit et especialment les homes qu'il avoit oudit val senz nul retenir toutevoie je le vuil et outroy que mesdiz sires ait et retiegne por luy et li suens [le] Guillo et l'Espaillié lour persones à lour vies et lour muebles et à lour vie et après lour decex come suens quites en tel maniere que après la mort doudit Guillo et Espaillié et de uns chescun de lour lour heritaiges et lour mès et tuit lour tenemant non mueble aquist et aquerre que il tiegnent et tanront ou vaul et ou finaige de Nant me doivent demorer et à mes hoirs quittes ansi come les autres choses contenues en la donacion faite à moy de part mon devantdit signour mais toutevoie les hoirs doudit Guillo et les hoirs doudit Espaillié se nuls en avoit de sa famme loialment esposée il puet retenir sus luy en sa terre autre part que à Nan si ansi estoit que il se vousissaint partir dessus moy En tesmoignaige de laquel chose je ay requis à religious home frere Guillaume abbé de Balerne que il mete son seal en ces presentes lettres Faites et donées le juedi après la quinzaine de Pasques l'an Nostre Signour mil CC nonante et trois