Charter Document - 02220413

Je dame Hugonete de Bers fame de mons Phelibert de Montagu chevaliers çay en arriers fais savoir à tous que je non mie deceue losangié ne contrainte de acun saige sachant et bien apensée par le loux et par le consentement et par la volunté de Hugonin mon fil ay vendu et par titre de pure et de parfaite vendicion baillié et delivré à noble baron mons Jehan de Chalon et à ses hoirs perpetuelment les doues parties dou diesme des vignes doudit mons Jehan de Chalon que je prenoie havoie et devoie percevoir es vignes de Froyqun ou champ dou Fu et en Novelors pour le pris de vint livres de petit tornois paiez bailliez et delivrez à moy enterignement en bons deniers nombrez [et] m'en tieng por bien paiez lesquex doues pars de diesme furent çay en arriers à Galois de Bers mon frere En tesmoing de laquel chose nous avons prié et fait metre en cex lettres le seal de la court noble baron à Renaut de Bourgoigne conte de Mombeliart douquel l'on use à Lons Ce fut fait et donné l'an Nostre Signour qui corroit par mil CCC et un ou mois de novembre