Charter Document - 02220412

Nous officiaux de la court de Besençon faisons savoir à touz que Clemençon fame çay en arriers Jehannin diz Enfanz Guillaume prestre curé de Rurey Hugonins et Jehans enfans des devant dit Jehannin et Clemençon ont confessé et congneu en droit et en jugement per devant nous que come Michiel Estevenon et Beçon freres qui furent de Villefens et estoient homes talables et espletables à Clemençon et ses enfant devantdiz se fussent partiz de Oans de la signorie es devantdiz Clemençon et ses enfant et fussent alez à Boujaille en la signorie de noble baron Jehan de Chalon signour d'Arlay et lidiz Clemençon et sui enfant demandassent es devantdiz homes les doues parties de touz lour muebles et que il issisent de la vile c'est à savoir de Oans où il estoient retornez de ces choses pais et acort fut entre les devantdiz Clemençon et ses enfant d'une part et ledit signour d'Allay et lesdiz homes d'autre part en tel maniere que lidiz homes demeurent à Oens ou lay où plera à devantdit signour d'Arlay et à ses hoirs et ont quitté et quittent lidiz Clemençon et sui enfant audit signour d'Allay les devantdiz homes et touz le droit et la raison que il avoient ou pooient avoir vers lours ne en lours muebles saul le mès que lidiz homes tenoient des devantdiz Clemençon et ses enfant et toutes les appendises doudit mès en quelque leu qu'il soit lequel mès et les appendises lidiz Clemençon et sui enfant ont expressement retenuz à lours quitte et delivré franchement Et pour la pais acors et quittance devantdites lidiz Clemençon et sui enfant ont eu et receu plenierement doudit signour d'Allay vint livres d'estevenens en bons deniers nombrés En tesmoignaige de laquel chose à la requeste des devantdiz Clemençon et sui enfant nous avons mis en ces lettres le seal de la court de Besençon Donné le juedi devant feste saint Mathé apostre l'an Nostre Signour mil CC et quatre vint et cinc