Charter Document - 02220411

Je Alix de Bers fame mons Perron de Goncent chevalier fais savoir à touz que je en recumpensacion des biens de servises et de dons fait à moy et à mes devantiers dou noble baron mons Jehan de Chalon signour d'Arlay et especialment pour dons que lidiz bers a fait à moy de vint livres d'estevenens lesquex je ay eues et receues de luy ay doné et done pour moy et pour les miens adit noble baron mons Jehan de Chalon et à ses hoirs permagnablement sans rapeler le mès Jehan de Sancenens et toutes les appendises doudit mès en quelque maniere que il s'estendent c'est à savoir en bois en pré en chans en homes en pescheries et en cours d'aigues en terres arables et non arables et don touz autres droit que avoir puis oudit mès et es appendises de celuy Ceste donacion je lidite Alix ai faite par l'exprex commandement et par la propre volunté de mon amé mari mons Perron de Goncent chevalier devantdit Et je lidiz Perron de Concen qui de ceste donacion faire doudit mès Jehan de Sancenens et de toutes les appendices d'iceluy ay doné plain pooir à ladite Alix ma fame ladite donacion j'ay volu et outroié et m'i suis consenti En tesmoing de laquel chose je lidite Alix et je lidiz Pierres de Conceit ses mariz havons requis les seaux des religiouses persones et honestes frere Renaut par la grace de Deu abbé de Baume et de frere Rogiers priours de Lons estre posez en ces presentes lettres Faites l'an de grace corrant par mil doux cenz octante et dix ou mois de jugnet