Charter Document - 02220410

Je Amie fille çay en arriers Wacheron de Meges escuiers fais savoir à touz que je non deceue ne baratée ne menée par force ne par barat mais de ma bone volunté et pour mon grant profit evidant et pour mes besoignes faire ay eschangey doné quitté et ontroié à touzjours mais à noble baron mons Jehan de Chalon signour d'Allay recevant et acceptant pour luy et pour ses hoirs Marion de Loncochon ses enfanz et lour mès Jaquete dou Truchet ses enfanz et lour meis Wuillame et Robert freres fiz Juhannan et lour mès lesquex me doivent vint et cint souz d'estevenens ou de menoie qui atant vaut le jour de feste saint Andrey après Bertet le Goillart des Comenailles ses enfanz et lour mès et la Lambuste dou Biez dou Four et son mès Mantion et son mès les enfanz Willomier et lour mès et quanque je ay puis et doy avoir de droit et de costume de exaction de servise de corvées de justice et de jurisdicion en touz les hommes dessus nommez après un bosseal de froment de cens lequel je ay sus le molin et le siege et les apartenances que l'on claime le molin à Chevalier qui siet entre Mignoviler et les Bocherens lequel l'on doit paier chescun anz le jour de la feste saint Martin d'iver après quatre deniers de cens que je ay sus le molin de la Vernete qui est es hoirs Voinnet Noiret lesquex l'on doit paier chescun anz le jour de Pasques flories après les trois parties des molins doux de Sauls et de la foule qui furent çay en arriers audit Vuacheron mon pere ensamble le font les appartenances et le corz de l'aigue dessus et dessoz et toutes les choses que je avoie et puis et doy avoir esdiz molins ou fonz es apartenances et es autres choses dessusdites Et ces choses dessusdites ansi come devisées sunt je ay doné en eschange à mondit signour dou cui fié lesdites choses sunt pour huit livres de rente à paier chescun anz à moy et à mes hoirs entre la feste saint Bartholomey et la nativité Nostre Dame pruchainemant ensigant lesquex il m'a doné en eschange pour les choses dessusdites et les m'a assis sus son peaige de Chalemont à panre et recevoir chescun an entre ladite feste saint Bartholomey et la nativité Nostre Dame Et se ansi estoit par aventure que les rentes doudit peaige fussent amaindries per acun caus sic que oudit terme je ou mi hoirs ne puissons avoir lesdites huit livres sus ledit peaige il les nous devroit paier autre part sus les rentes dou val de Meges Et lesdites huit livres de rentes sunt dou fié mondit seignour ensi come les choses dessusdites estoient En tesmoignaige de laquel chose je ledite Amie et je Miles mariz de ladite Amie avons requis et fait metre en ces presentes lettres le seal pendant de l'onorable chapitre de Saint Anathoile de Salins Données en l'an Nostre Signour qui corroit par mil CC et octante et dix ou mois de novembre