Charter Document - 02220408

A touz cex qui ces presentes lettres verront et orront nous Jehans par la grace de Deu duc de Lothier de Braybant et de Lambourt faisons savoir que pour raison de la feauté et de l'omaige que aut homs noz chiers feables messires Jehans de Chalon sires d'Allay nous ha fait nous li avons doné et donons heritablement et à ses hoirs à toutjour à tenir de nous et de noz hoirs la vile d'Aske le Nuef Molin delez Bruselle et toutes les apertenances de cesdiz leus en signories en justices autes et basses en cens en rentes en terres en prel en bois en yawes en forfait et en amendes et en toutes autres choses que nous y avons coment elles puissent estre appellées horsmis noz maisons de religions et noz lombard que nous et nostre hoirs y devront metre de part nous pour quatre cent livrées de terre à noir tornois par anz en tel maniere que se esdiz leus ou es apertenances lesdites quatre cenz livrées par anz ne puissent planierement estre trovées nous li promettons et avons encovent loialment et en bone foy d'assener la deffaute aillours à plus près desdiz leus soffisaument ausi se esdiz leus et es appendises il est plus que lesdites quatre cenz livrées par an nous li devons rabatre le sourplus de l'asseement des wit cenz livrées par an que nous li avons assenez à nostre bois de Sougne si come dessous est contenuz mais il est à savoir qui li maison dou Nuef Molin ne li manoirs ne doivent mie estre empusié desdites quatre cenz livrées Après nous li avons doné et donons heritablement luy et à ses hoirs pour douze mille livres de tornois noirs que nous avons eu de luy et receu mis et torney en nostre profit wit cenz livrées de terre à tornois noirs per an à tenir de nous et de noz hoirs en fyez lesquex nous li avons assené et assinons à prendre et à recevoir chescun an de noz vendages de nos boiz de Sougne Se mandons et comandons à noz receveours et à noz vendeours de noz bois que sont et à venir sont que il à chascun vendaige de may à faire chascun anz illz facent asseys adit mons Jehan et à ses hoirs ou à lour certain messaige des premiers deniers doudit vendaige desdites wit cenz livrées delivrant à çaus mercheant desdiz bois sofsaument duke à la some desdites huit cenz livrées Et volons que lesdites wit cenz livrées per anz il puist requerre et ens metre chescun anz et tel maniere et en toute autel droiture et costume come nous ferons asquies mons Jehan et à ses hoirs nous prometons loialment pour nous et pour noz hoirs d'estre warrans de ces choses et d'yaus garder appasier et deffendre contre touz ciaux qui ampachier les en vouroient Et se lidiz bois ne valoit ou nous ou nostre hoirs qui saront pour le tems ne vousissiens que li vendaiges dou bois se feit nous li devons faire autre part en assi soffisant luy dedent nostre duché lesdites wit cenz livrées come elles estoient sus ledit bois Et se lidiz messire Jehans ou sui hoirs avoient aucune deffaute doudit paiement ou à requerir il feissent acun cost ou despens nous sumes assi tenuz des domaiges couz et despens en tel maniere come de la assignacion principal et luy et à ses hoirs nous en devons croire per lour simple soirement senz autre prueve Et desdiz biens lidiz messire Jehans nous a fait homaige et feautey si come il dut et receu l'en avons à homme Encore avons nous outroié audit mons Jehan que il puist acheter et aquerre de noz fiez en nostre signorie et en nostre terre sau ce que ces aquestes il tanra de nous et devra tenir et recevoir de nous en fiez et de nos hoirs et que desdiz biens que donez et assiné li avons et qu'il aquerra il puist doner vendre engagier ou cangier à cuy et toutes foiz qu'il li plera horsmis genz de religion et bourgois et sauz en ce nostre homaige pour nous et pour noz hoirs et volons que de ces biens il puist plodier per procourour si besoing soit si avant come li lois dou pais ensoigne Et se il avenoit que pour nostre besoigne et la besoigne de nostre terre nous eussiens à faire de noz homes de fiez nous greons que li bailliz et li homes doudit mons Jehan desdiz leus nous servent en ces besoignes sic que les autres homes de nostre terre nous serviront se lidiz messires Jehans n'estoit ou pais ou il n'i peut covenablement estre Ces dons et ces assenement nous avons encovent loialment et en bone foy et par nostre soirement sus ce doné pour nous et pour noz successours à tenir adit mons Jehan et à ses hoirs et que à nuntes nous ne ne ferons ne ne vanrons à l'encontre covertement ne en apart per nous ne per atruy et se nous le fassiens ou soffriens à faire que jà n'aviegne nos obligons noz biens pour nous et pour noz hoirs adit monsignour Jehan et à ses hoirs à prendre et à recevoir partout senz forfaire envers nous ne envers noz hoirs tanque raison lour en soit planierement faite A ce don cest assenement et cest homaige faire furent present noble home nostre chier feauble Waleranz sires de Montjoie et de Faukemont Jehans Bricaus diz de Belars Jehans sires de Huesdenne Willames de Kut Ylhains de Miaudrege Damans de Bokut Willames de Brichenz chevaliers et plusours autres En tesmoing desquel choses nous avons penduz noz propre seal en ces presentes lettres Donné à Bruxelle le sambadi après la feste saint Luc l'an de grace mil et trois cenz