Charter Document - 02220406

Nous officiaux de la court de Besençon faisons savoir que messires Jehans sires de La Chaissaigne chevaliers a confessé en droit per devant nostre commandement et publiement cogneu luy avoir vendu quitté baillié outroié et delivré pour lui et pour les suens permaignablement senz jemais rapeler à noble baron et puissant mons Jehan de Chalon signour d'Allay acceptant et recevant pour luy et pour les siens les terres et les meys les rentes les signories et les choses cy après escriptes et devisées c'est à savoir toutes les choses que il tient puet et doit tenir et avoir de part la conquise que il feit de Wuillemin de Flamerens à Biens à Montantin et à Fours es viles es finaiges et es terretoires es appendises et es apertenances de ces leus premierement la moitié dou meis Perron Billart liquex moitié dou mès contient dix jornax de terre arable une fal de prel la vigne à demey mui de vin et la cheneviere à demi bosseal de chenevey et deme chasal senz devis item la moitié des mès à Bal et à la Tredie liquel moitié est estimée senz devis à trois jornax et demi de terre gaignable le prel à demi cherrée de foin et la cheneviere à demi bosseal de chenevey et demi chasal item la moitié dou mès es enfanz Joffroy liquel moitié est estimée à quatre jornaux de terre arable la vigne à un muy et demi un chasal et la cheneviere à un bosseal de chenevey item demi le mès es enfanz Rogier estimé ladite moitié à quatre jornaux de terre arable la vigne à demy muy de vin et la cheneviere à demi bosseal de chenevey item la moitié dou meys Rodin estimé à quatre jornaux de terre arable le prel à demi cherrée de foin et la cheneviere à demi bosseal de chenevey item la moitié dou mès Blanchar estimé ladite moitié à doux jornaux de terre arable et [la] cheneviere à un bosseal de chenevey et un chasal et la vigne à un quarriz de vin item la moitié dou mès à Cassignet estimé ladite moitié à six jornaux de terre et la vigne à un muy de vin et un chasal et les terres dessusdites sient à Biens ou finaige et ou terretoire de cest leu ensamble les hommes qui tiegnent les terres et les choses dessusdites vendues par tant con il apartient à la moitié desdiz meys vendus Item à Montantin les doues part dou mès Gaiat estimées à huit jornaux de terre et les doues part d'une septure de prel la cheneviere à un bosseal de chenevey et les doues parts de un chasal item les doues part dou mès Chastaint estimées à huit jornaux de terre gaignable et les dues part d'une fal de prey la cheneviere à un bosseal de chenevey et les doues part de un chasal item les dues pars dou mès à Rosselet estimés à huit jornaux de terre gaignable et les dues pars d'une septure de prey les dues pars de un chasal la cheneviere à un bosseal de chenevey item les doues pars dou mès à fil à Donzel estimés à huit jornaux de terre gaignable les dues pars d'une septure de prel les dues pars de un chasal la cheneviere à un bosseal de chenevey ensamble les dues pars des homes de Montantin qui tiegnent les terres dessusdites vendues par tant come il apartient es doues pars desdiz meys venduz sauz que la persone Girart fiz à Belete qui est hons doudit mons Jehan le Chessaignet de part sa fame qui tient huit jornaus de ladite terre vendue les doues pars d'une septure de prey la cheneviere à un bosseal et les dues pars de un chasal qui fut dou mès Girart Chostaint liquies huit jornax de terre les dues pars de la septure de prey la cheneviere les dues pars dou chasal sunt adit mons Jeham de Chalon pour raison de ladite vendue et la puet laissier oudit Girart ou autruy ou faire sa volunté Item a vendu quittey bailliez ou assi et delivrey ledit messire Jehans sires de La Chessaigne permaignablement pour luy et pour les suens adit mons de Chalon le siexte de la justice grant et petite de Byens de Montanti et de Forz et le siexte des corvées des cherrues des viles dessusdites et le siexte dou plait general que l'on tient à Biens et le doit l'on paier ou mois de septembre et generament toutes les choses que lidiz Jehans Chassaignet avoit pooit ou devoit avoir et tenir de part Vuillemin de Flamerent dessusdit es viles de Biens de Montanti et de Forz dessusdites es finaiges terretoires appendises et appertenances desdites viles en quelque maniere qu'elles soient nommées ou appelées senz riens retenir pour le pris de cenz livres de bone monoie coursable et prenable en la cité et en la dyocese de Besençon paiés et delivrées adit mons Jehan Chassaignet doudit mons Jehan de Chalon en bons deniers nombrez ansi come lidiz Jehans Chassaignat l'a confessé en droit et affermé publiement par devant nostredit comandement En tesmoignaige de laquel chose nous officiaux dessusdit à la requeste doudit Jehan Chassaignat faite à nous par ledit nostre commandement et par l'apposicion de son seal pendu en ces lettres avons fait seeler ces presentes lettres dou seal de ladite court de Besençon ensamble le seal doudit Jehan Chassaignet Et je Jehans dessusdiz sires de La Chassaigne ay mis mon seal pendant en ces presentes lettres ensamble le seal de ladite court de Besençon en tesmoignaige de verté Ce fut fait et doné le sambadi après la feste de la Magdeleine l'an de grace corrant par mil trois cenz et doux