Charter Document - 02220405

Nous Hugues dux de Bourgoigne faisons savoir à touz que nous avons vehues unes lettres saines et entieres non cancellées non violées seelées des seaux de noz amés et feaux Biatrix de Bourgoingne contesse de La Marche et d'Angolesme et de monsignour Jehan de Chalon signour d'Arlay et de madame Merguerite de Bourgoingne sa femme et suer de ladite contesse desquelles lettres est la tenour tele come s'ensuet A touz ces qui verront et orront ces presentes lettres Jehans de Chalon sires d'Arlay et Merguerite sa fame et Biatrix de Bourgoingne contesse de La Marche et d'Angolesme suer de ladite Merguerite salut Sachent tuit que come li chesteaul et la chestellenie de Lylle souz Monreaul o touz ses droiz et o toutes ses apartenances soit demuré pour non devis entre nous lesdites suers nous ladite Biatrix contesse baillons et recoignossons que nous avons baillié tout le droit et la possession de la moitié apertenant à nous pour non devis es devantdiz chestiaux et chestelenie et les apertenans d'yceux es devantdit monsignour Jehan de Chalon et madame Merguerite sa fame nostre suer et es hoirs qui istront d'yaus à tenir et esploitier d'eaux et de lour hoirs en rendant et paiant chescun anz tant come nous vivrons unze cenz livres de petit tornois à Paris en la priorté dou Val des Escoliers de Paris à nous ou à nostre comandemant c'est à savoir cinc cenz et cinquante livres à la quinzaine de la feste de Touz Sains et les autres cinc cenz et cinquante livres à jour de la quinzaine de la feste de Pasques ensegant et ensi chescune année tout le cours de nostre vie sauve et retenu expressement à nous ladite contesse que s'il avenoit que nous eussons hoirs de nostre cors ceste baille et tradicion dou droit et de la possession des choses dessusdites seroit nulle et de nulle value et tout nostre droit seroit ou point et en l'estat qu'il estoit au jour de ceste covenance avant la confection de ceste lettre et se il avenoit que nous morissons senz hoir de nostre cors nous voluns que les choses dessusdites demuerent perpetuelment à ladite Merguerite nostre suer et es hoirs qui istront de ly sauve et retenu à nous ce que nous en voudrons doner ou lessier en testament ou per cause de mort Et toutes ces choses dessusdites nous ladite Beatris prometons à tenir et garder en bone foy senz venir encontre Et adecertes nous les devantdiz Jeham et Merguerite sa fame suer de ladite dame Beatris confessons et publiement recognossons avoir pris et receu de la devantdite madame Byatrix tout le droit et toute la possession de la moitié desdiz chesteaux et chestelenie de Lyle et des apertenances en la forme et en la maniere dessusdite et confessons et recognossons nous devoir et chescun de nous pour le tout à la devantdite dame Biatrix pour raison et pour cause des choses devantdites à nous bailliées de ly chescune année tout le cors de la vie de ladite madame Biatrix unze cenz livres de petis tornois lesquies unze cens livres nous et chescun de nous li prometons à rendre et paier chescune année tant come elle vivra à Paris ou leu dessusdit et es doux termes c'est à savoir cinq cenz et cinquante livres à jour de la quinzaine de la feste de Touz Sains et les autres cinc cenz et cinquante livres à jour de la quinzaine de la feste des Pasques ensegant et ensi esdiz termes chescune année tant come ladite madame Biatrix vivra Et se il avenoit que nous ou li uns de nous defaillessons en paiement desdiz deniers es termes dessusdit ou en l'un d'iaux nos et chescun de nos volons que ladite madame Biatrix puisse prendre tantost per soy ou per autre le terme passé ouquel nous deffaudrons de paiement se dedenz la quinzaine après ensegant nous n'avions paiez [à] ladite madame Biatrix les deniers dou terme passé la possession desdiz chestaux et chestelenie de Lyle de toutes ses apertenances et de Viteaux et de toutes ses apertenances et entrer en la possession desdiz leus et prendre de sa propre autorité et faire panre touz les muebles que saront esdiz leus et tous les fruit profit et issues et de touz les emolumens qui istront et porront estre perceu desdiz leus et desdites choses et des rentes apertenant esdiz leus et de toute autre justice et juridiction jusque à tant qu'il soit plenierement satisfait à ladite Biatrix doudit paiement ou des paiement dou temps passé avec touz les couz mises et despens faiz ou sustenuz par devant dou paiement ou des paiement non fait desquies mises et despens et des choses prises et levées nous volons que li procurour ladite madame Biatrix soit creu par son soirement senz autre prouve et declaracion faire et senz taxacion de juge ne de soverain En laquel prise de possession et de biens fruiz issues et profit de ceaux et en touz autres emolument jurisdiction et justice nous et chescun de nous prometons que nous ne empacherons ne farons empachier par nous ne par autre ladite dame Biatrix que ele par soy ou par autre si con est diz dessus ne puisse prendre et entrer en la possession des choses dessusdites et les biens muebles estanz es leus dessusdit à temps de la prise et touz les autres qui istront et porront et devront estre perceuz faire lever et percevoir entierement et pasiblement jusques à la some de son debte et de ses couz et domaiges ou soirement de son procureour si come il est diz dessus et se aucun empeschement y estoit mis par avant ou après nous et chescun de nous li prometons à hoster à noz propres despens devant huicte jours dois le jour que ladite madame Biatrix aura mis et sera entrée ou voudra entrer en la possession desdites choses et se pour deffaut de ces choses ladite dame sustenoit couz ou despens et domaiges nous et chescun de nous les li prometons à rendre à simple soirement de son procureour senz autre preuve ou declaracion faire et senz taxacion de juge Et neantmoinz nous volons que se i plait à ladite dame Biatrix que elle puisse ladite execucion faire acomplir par l'auctorité de excellanz prince nostre signour le roy de France et de celuy de Navarre conte de Champaigne et de Brye ou de lour bailliz ou aloez et dou noble duc de Bourgoingne tant come il apartient ou puet apertenir à pooir ou à la juridiction des roys conte et duc et à chescun d'yaux Pour lesquelles choses dessusdites et chescune d'icelles nous et chescun de nous pour le tout obligeons à ladite madame Biatrix nous et non hoirs touz non biens et de noz hoirs et de chescun de nous muebles et non muebles presenz et à venir emsic que per ceste general obligacion ne soit fait prejudice en riens à la especiauté dessus dite et faite et que chescune demuere en son pooir et force