Charter Document - 02220403

Nous Jehans de Vienne sires de Mirebel en montaigne faisons savoir à touz que nous en non de permutacion ou d'eschange baillons et delivrons avons baillié et delivré à haut homme et puissant Jehan de Chalon signour d'Allay pour luy et pour les suens perpetuelment tel droit tel action con nous avons poons et devons avoir en Ylay et es appendises soit en bois en champs en prel en laic en aigues en pescheries en justices en signories et en toutes autres manieres de choses coment qu'eles soient appelées et especialment en toutes les choses que nous y avons desquex nous sumes parceniers es moignes de Gigney lesquex choses dessusdites nous tenons en fié doudit Jehan signour d'Allay Et pour ces choses dessusdites lidiz Jehans de Chalon en nom de la devantdite permutacion nous a bailliez et delivrez une soue vile qui communement est appelée Cuvier ensamble toutes les appendises laquelle nous tenons et devons tenir de luy en fié et nous en a mis en possession corporal ou auxi et a promis garantir par contre toutes genz En tesmoignaige de laquel chose nous avons mis nostre seal en ces presentes lettres et avons prié et requis saiges et discretes persones le chapitre de Saint Anathoile de Salins que il en ces lettres vuillent metre lour seau avec le nostre Faites et donées l'an Nostre Signour corrant par mil CCC et doux le mardi [de] l'uictive saint Pere et saint Poul