Charter Document - 02220400
| Charter Number: | 02220400 |
|---|---|
| Cartulary Title: | Cartulaire de Hugues de Chalon (1220-1319) |
| Charter Language: | Latin |
| Charter Origin: | Religious |
| Charter Type(s): | Purchase |
| Date: | 1301 |
| Date type: | Internal, A.D., Feast, Lunar |
| Resource Link(s): |
Patrimoine numérisé de Besançon - MS Droz 21 - Tome 1 (p.936) |
Charter:
Nos frater Bertrandus miseratione divina Clugniacensis ecclesie minister humilis notum facimus universis quod cum vir nobilissimus dominus Johannes de Cabilone dominus de Allato acquisiverit secundum quod a fide dignis audivimus totam picem crescentem in dominaturis quibuscumque circumquaque prioratum nostrum de Mortuaaqua pro precio videlicet cuilibet hominum dictam picem colligentium pro quolibet centum de pice nigra sex solidos et pro quolibet centum picis albe quinque solidos de moneta in archiepiscopatu Bisuntino communiter cursum habente nos circonspecta evidenti utilitate predicti prioratus nostri de Mortuaaqua prout ex relacione aliquorum in predicta negociacione expertorum plenarie extitimus informati volumus et concedimus quod dictus dominus Johannes totam picem que collegi poterit in nemoribus nostris prioratus predicti de Mortuaaqua habeat teneat et possideat pro precio prenominato videlicet nigram pro sex solidis et albam pro quinque solidis monete supradicte et hoc solummodo quoad vixerit ita tamen quod homines nostri predicti prioratus cum picem decollectam habuerint ad quandam domum magne ville de Mortuaaqua deffere debeant et certo mandato domini Johannis ad hoc specialiter deputato nuntiare et postquam mandato dicti domini Johannis nuntiaverint nisi intra quindecim dies continue sequentes predictus dominus Johannes vel ab eo mandatum habens dictam picem retinere voluerit pro precio superius jam expresso tunc homines predicti prioratus qui picem supra scripto termino quindecim videlicet diebus custodierint libere alibicumque distrahere poterunt pro libito voluntatis Et si forte contingeret quod dictus dominus Johannes vel ejus nuncius ad hoc specialiter deputatus uno anno vel pluribus in colligendo dictam picem deficeret guerre occasione vel aliqua aliaquaque ratione volumus et concedimus quod anno sequenti vel annis sequentibus habere possit sine contradictione aliqua pro precio supra scripto et in annis quibus in collectione dicte picis deficeret homines predicti prioratus nostri de pice per eos anno defectus collecta facere possint suam omnimodam voluntatem Actum est etiam inter nos et dictum dominum Johannem quod pix predicta ad stateram vel pondus prioratus nostri predicti de Mortuaaqua debeat ponderari secundum quod in villa de Vercellis communiter ponderatur Hanc autem gratiam seu concessionem quam nos predicto Johanni fecimus quandiu in rebus humanis supervixerit valere volumus et non ultra scientes nichilominus quod dictus dominus Johannes non potest aliquid petere seu reclamare in predicto prioratu nostro de Mortuaaqua in hominibus nemoribus juribus ceteris nec aliquam jurisdictionem exercere exceptis hiis que in superiori exprimuntur In cujus rei testimonium sigillum nostrum presentibus litteris duximus apponendum Datum Clugniaco die lune post festum sancti Georgii in capitulo Clugniacensi generali anno Domini millesimo trecentesimo primo