Charter Document - 02220399

Je Rolins sires de Nuefchestel sus le Laic en l'aveschiez de Losanne faiz savoir à touz que je non mie deceu ne controin mais de ma bone volunté et pour mon profit evidant presenz et à venir ay volu vuis donois quitte et outroie en maniere et en non de vendicion perpetuel pour moy et pour mes hoirs à noble baron Jehan de Chalon signour d'Arlay mon tres bien amé signour pour luy et pour ses hoirs pour le pris de quatre cenz livres de petit tornois lesquelx je ay receues doudit monsignour Jehan entierement et tornées en mon profit que toute la poiz qui sera coillie et faite toutes les années çay en avant à venir en touz les bois et toutes les jouz qui sont de toute ma juridicion et toute ma signorie ce est à savoir en la chestellenie et en la signorie de Rochefort et de Valtravers ne puisse estre vendue ne delivrée à nule persone tanque à ce qu'elle soit deschergié une foiz en l'année c'est à savoir la quinzaine de feste Touz Sains en aucun hostel de la vile de Valtravers en laquelle li priorés est et enqui doit demorer huit jours passez se il ne l'avoit prise li mercheanz et cil cui li poiz seroit en porroient et devroient faire lour volunté senz nul contredit doudit nostre signour Jehan de Chalon et autrement non Et est à entendre que lidiz nostres sires Jehans de Chalon ou li suens puent ce faire toutes les années qui sunt à venir à touzjours mais une chescune année ensi come elles s'ensegrunt et se il tout ne le façoit l'une des années que pour ce moins sa possession ne li fut troblée que il ne la peut faire l'autre senz nul contredit de nulle persone Et se ansi estoit que acuns de noz genz ou autres emportoit de ladite poiz fuers dou leu ou vendoit à autre devant ledit terme nous volons et outroions que lidiz nostre sires Jehans ou ses comandement la puisse panre et avoir senz riens paier et nous sus ces qui ce auroient fait panriens nostre mellour selon ce que il y aferroit Et de ce faire nous donons plain pooir audit nostre signour Jehan et l'en metons en possession par la tradicion de ces presentes En tesmoignaige de laquel chose j'ai bailliés ces lettres adit mons Jehan seelées de mon seal et à plus grant fermeté j'ai prié et requis à nobles homes mons Gautier de Monfacon et mons Symon de Mombeliar signour de Montron que il metent lours seaux en ces lettres avez le mien seel Faites et donnés l'an Nostre Signour mil doux cenz nonante et sept ou mois d'aost