Charter Document - 02220398

Nous Jehans de Mombeliart sires de Monfacon faisons savoir à touz que nous non mie deceu ne contrainz mais de nostre bone volunté et pour nostre profit evidant presenz et à venir avons volu volons et outroions donons et quittons en maniere et en nom de vendicion perpetuel pour nous et pour noz hoirs à noble et puissant baron nostre chier signour Jehan de Chalon signour d'Arlay pour luy et pour ses hoirs pour le pris de quatre cenz livres de petit tornois lesquex nous avons receues doudit nostre signour Jehan entierement et tornées en nostre profit que toute la poiz qui sera coillie et faite toute les années çay en avant à venir en touz les bois et en toutes les jouz qui sunt de toute nostre jurisdiction et de toute nostre signorie cest à savoir es jouz de Morteau et es autres enqui environ qui sunt de nostre signorise ne puisse estre vendue ne delivrée à nulle persone tanque à ce qu'elle soit deschergié une foiz en l'année c'est à savoir la quinzaine de feste de Touz Sains en acum hostel de la grant vile de Mortaul et enqui en doit demorer VIII jours continuez senz vendre ne delivrer à nulle persone se ce n'estoit audit mons Jehan de Chalon ou à son comandement Et est à savoir [que] se lidiz messires Jehans ou ses comandement la vuet avoir il la doit avoir et puet panre senz nul contredit de nous ne d'autre en tel maniere que il doit paier pour le cenz pesanz de la poiz blanche cinc souz d'estevenens et pour le cenz pesanz de la poiz noire siex souz d'estevenens et non plus et pour tel pris il doit avoir toute la poiz qui y saroit deenz les huit jours premiers que elle y auroit estez mise et les huit jours passez se il ne l'avoit prise li mercheanz et cil cui li poiz seroit en porroient et devroient faire lour volunté senz nul contredit doudit nostre signour Jehan de Chalon et autrement non Et est à entendre que lidiz nostres sires Jehans de Chalon ou li suens puent ce faire toutes les années qui sunt à venir à touzjours mais une chescune année ensi come elles s'ensegrunt et se il tout ne le façoit l'une des années que pour ce moins sa possession ne li fut troblée que il ne la peut faire l'autre senz nul contredit de nulle persone Et se ansi estoit que acuns de noz genz ou autres emportoit de ladite poiz fuers dou leu ou vendoit à autre devant ledit terme nous volons et outroions que lidiz nostre sires Jehans ou ses comandement la puisse panre et avoir senz riens paier et nous sus ces qui ce auroient fait panriens nostre mellour selon ce que il y aferroit Et de ce faire nous donons plain pooir audit nostre signour Jehan et l'en metons en possession par la tradicion de ces presentes En tesmoignaige de laquel chose nous avons bailliés ces lettres audit nostre signour Jehan seelées de nostre seal et à plus grant fermeté nous avons prié et requis à nobles homes nostre chiers freres mons Gauthier de Monfacon et mons Symon de Monbeliart signour de Montron que il metent lours seaux en cex lettres avez le nostre seal Faites et donées en l'an Nostre Signour corrant mil CC nonante et six ou mois d'aost