Charter Document - 02220392

Je Guillames de Biaumes chevaliers fais savoir à touz que je ay doné quitté et outroié et baillié à noble baron Jehan conte de Bourgoigne et signour de Salins et à ses hoirs quanque je avoie et devoie avoir à Cuvier à Viler Estevenon et en la vile de Meges et en tout le vaul de Meges en quelque chose que ce soit en champs en prés en bois en censes en homes en justice en signorie et en toutes autres choses quelque elles soient que il et sui hoir doivent avoir et tenir à toutjour mais en eschange de la ville de Chaumergis et de la maison fort doudit leu ensamble les apartenances de ladite ville en quelque chose que elles soient en champs en prés en bois en vignes en justice en signorie en molin et en reviere sauz les prelz de quatre cherrées de foin que lidiz cuens a retenuz es prez doudit leu devers La Chassigne pour faire sa volunté Et après je li ay doné cinquante livres d'estevenens pour ledit eschange Et est à savoir que lesdites choses devons tenir en fié je et li miens doudit conte En tesmoignaige de laquel chose li religious barons et honestes li abbes de Balerne et li abbes de Rosieres de l'ordre de Citiaux ont mis lour seaux pendant en ces presentes lettres à ma priere et à ma requeste Ce fut fait l'an de l'incarnation Nostre Signour qui corroit par mil CC sexante et on le jour des Innocenz