Charter Document - 02220391

Je dam Pierre de Bire diz Jorainz fais savoir à touz que je par le lous et par la volunté de Nicolet mon fil et de Sebile sa fame et de Perrin diz Proudome mon fil et de Perretain sa fame et de Hombert mon fil et de Guyete fame Juenet dit Gaigneour çay en arriers mon fil pour le commun profit de moy et de lour ay vendu quitté et outroié à la noble dame Lore contesse de Bourgoigne et dame de Salins la quarte partie dou molin dit d'Espaillart assis entre Noseroy et Molpré et quelque droit que je et my fil avions et devions avoir en l'autre quarte partie doudit molin ou par gagiere ou en autre maniere pour douze livres d'estevenens que je ay receu de ladite contesse en pecune nombrée tornée en mon profit et ou profit de mesdiz enfanz et de lours fames et de ladite Guyete En tesmoignaige de ce à noz prieres et à noz requestes li chapitres de Saint Anathoile et li chapitres de Saint Michiel de Salins ont mis lour seaux pendant en ces lettres Ce fut fait le vanredi après feste saint Denis l'an de l'Incarnation qui corroit mil CC sexante et doux