Charter Document - 02220390

Je Huguenins de Chapoy fiz çay en arriers mons Renaut de Monmoret chevaliers fais savoir à touz ces qui verront ces presentes lettres que je non mie deceu contraint ne par force ne par paour ne par barat ne par proieres mais de ma propre volunté et pour besoignes que je avoie despagier ai vendu vende baille quitte et outroie permaignablement et senz jamais rapeler à noble baron Jehan de Chalon signour d'Allay trois maignies d'omes que je tenoie et avoie à Emondens de mon propre alleuf et lour mès c'est à savoir Thomas le frere Robert à Corvoisier et son mès Wienet Dou Vergier et son mès et Robert dit Moines et son mès et quanque je ay et puis avoir et doi en la ville d'Emondens ou terretoire ou finaige et es appendises de ladite ville en bois en prel en champs en maisons en courtiz en cens en justice en signorie et en toutes autres choses queles qu'elles soient et où qu'elles soient pour vint livres d'estevenens bons et loiaux lesquex je reconois que je ay eues et receues de luy en bons deniers nombrez et m'en tien pour bien paiez et en quitte ledit Jehan et ses hoirs pour moy et pour les miens et me deveste En tesmoignaige de laquel chose je ay requis et fait metre en ces lettres le seal dou chapitre de l'iglyse de Saint Michiel de Salins Ce fut fait l'an de l'incarnation Nostre Signour qui corroit par mil CC sexante et seze ou mois de marz