Charter Document - 02220389

Je Estevenin de Lesine escuiers fiz çay en arriers Perrin prevost de Lesyne fais savoir à touz que je vent de ma propre volunté à noble baron mons Jehan de Chalon signour d'Allay et es suens permaignablement les choses cy après escriptes c'est à savoir Jehannin d'Alaise mon home fiz Jehannet ensamble son mès item Vuillemin Legeret mon home ensamble son mès item Hugonin mon homme fiz Haimonet ensamble son mès item doux jornax de terre assis ou leu que l'on dit Cratecul tochant à la terre Saint Pierre item doux jornaux de terre assise ou leu que l'on dit champ des Pis delez le champ Cholier item un jornal de terre assis ou champ de la Vigne delez le champ Dan en avant item doux jornax delez les Fuilles tochant à prel mons Fromont item trois jornaux es Viez Essart delez le bois item un jornal en Riviers tochant à Poiz item doux jornaux ou grez de Valunge delez le bois item quatre jornaux en Soumont delez le chemin de Salins item un jornal en champ Mabert delez le champ Costantin item un jornal en la voie de Myon item un jornal en combe Chanel tochant à Lyson item doux jornaux en la combe Cholier delez la terre qui fut audit Cholier item doux jornaux en la Faie delez Lisun item un chasaul et les appendises item un jornal tochant adit chasaul assis à Alaise liquex doit trois souz de cens es enfanz Richart de Mellant item six septures de prel en Valonge item un chesaul et les appendices touchant à chesaul Bardet item un chesaul assis [à] Alaise delez le chesaul à Rotier et doit doux souz de cens à Ponce fille Girart d'Alaise item et quanque j'ay puis ne doi avoir per quelque maniere que ce soit en la vile ou terretoire et ou finaige d'Alaise en homes en terres en signories et en toutes autres choses Et denunce en ceste vendue les choses dessusdites que je venz estre dou fié à la Renaude fame jadis Richart de Mellant et li venz cesdites choses pour le pris de vint et cinc livres d'estevenens lesquex j'ai receues doudit mons Jehan en bons deniers nombrez et m'en tien pour bien paiez En tesmoignaige de laquel chose je lidiz Estevenins ay requis et fait metre en ces lettres le seal dou chapitre Saint Moris de Salins Données l'an mil CC et nonante ou mois de juillet