Charter Document - 02220387

Je Pierres çay en arriers fiz Gralet de Mellant fais savoir à touz que je non mie deceu ne contraint ains de ma bone volunté ay vendu doné quitté et outroié permaignablement à noble baron Jehan de Chalon signour d'Arlay ce que je ay et puis ne doy avoir ou finaige et ou terretoire de Mellant c'est à savoir la moitié dou champ de Quoymiel qui siet lez le champ Jehannin à Fevre d'Ornens d'une part et le champ à la Quequeile d'autre part et demi le champ qui siet en la vi de Lysene lez le champ à Saint d'une part et le champ Malant d'autre part et la moitié dou tier dou champ de Maleschart qui siet lez le champ Richart à fiz Oudet d'une part et le champ à Gay d'autre part la moytié de l'oye de Choys qui siet lez le biez d'une part et le champ Besençon d'autre part et la moitié dou champ de la Cracena qui siet lez le champ mons Huedon d'Esterno d'une part et le champ Vuillaume Verlain d'autre part et la moitié dou champ qui siet sous Cembloy lez le champ mons Huedon d'Esterno d'une part et le champ à Bau d'autre part et la moytié de l'oye qui siet desoz le mostier lez le champ Vuillame Verlin d'une part et le biez d'autre et la moitié dou champ qui siet en combe Terniot lez le champ es filles Chopin d'une part et lez le champ Willame Verlin d'autre et demi le champ qui siet en combe Ternot lez le champ Richart à fiz Estevenin d'une part et le champ Marlant d'autre et la moitié dou champ Costeret qui siet lez le champ Perrin à Loschart de Buyres d'une part et le champ Beccart d'autre et un chasal qui siet lez le chasal Haymonin à la Plumete d'une part et celuy Jaquat mon frere d'autre et demi un chasal qui siet lez le chasal audit Jaquet per dessus le qur de Burgeret et por ce le remanant en quelque meniere que je li aie soit en prel en champ en bois en revieres en justices en commune en chesal en cheneviere et en toutes autres apertenances pour cenz et dix sous d'estevenens bons et loyaus lesquex cenz et dix souz je ay receu doudit Jehan en bons deniers nombrez et m'en tieng por bien paié En tesmoignaige de laquel chose je lidiz Pierres ay prié et requis à religious home Estene abbé de Buillon qu'il mete son seal en ces presentes lettres Faites et donées l'an Nostre Signour corrant par mil CC octante et doux ou mois de juillet