Charter Document - 02220381

Je Pierres diz Billars chevaliers de Ceys fais savoir à touz que je ay vendu doné et quitté et outroié permaignablement à noble baron Jehan conte de Bourgoigne et signour de Salins et à ses hoirs qui saront signour de Monmaour le mès Bonoillet et le mès Forquet de Levier et touz us et toutes costumes que esdiz meis doy avoir ne aye es devantdiz meys et toutes les choses qui apartiegnent esdiz meys liquex meis ont et doivent avoir vint et ouit jornax de terre et les prel à nuef cherrées de foin pour vint livres d'estevenans lesquex ou temps de ladite vendicion ay receues en bons deniers nombrez tornez en mon profit desquex deniers je me tieng planierement pour paiez en pecune nombrée En tesmoignaige de laquel chose je l'en ay bailliez ces presentes lettres seelées dou seal dou chapitre de Saint Michiel de Salins Ce fut fait ou mois de fevrier l'an que l'incarnation Nostre Signour corroit par mil CC sexante et un an