Charter Document - 02220379
| Charter Number: | 02220379 |
|---|---|
| Cartulary Title: | Cartulaire de Hugues de Chalon (1220-1319) |
| Charter Language: | French |
| Charter Origin: | Lay |
| Charter Type(s): | Purchase |
| Date: | 1259 |
| Date type: | Internal, A.D. |
| Resource Link(s): |
Patrimoine numérisé de Besançon - MS Droz 21 - Tome 1 (p.870) |
Charter:
Je Haymonins li Posche fiz Lambert d'Esterno et je Nycolez li clers Garniers et Lambelins freres fiz Haymonet d'Esterno et je Jehans Pierres et Hugues freres fiz Bernaut d'Esterno faisons savoir à touz que nous avons vendu et outroié à noble baron Jehan conte de Bourgoigne et signour de Salins et à ses hoirs à touzjours mais permaignablement le prel des Pontez dessous Monmaour qui nostres estoit par le lous et par le consentement de mons Guyon de Bolando chevalier nostre signour pour ouit livres d'estevenans que nous avons receu en pecune nombrée et desquex nous nous tegnons pour paiez Et ceste vendue promettons nous garantir audit conte et es siens contre toutes genz loialment et à bone foy Et je Guys de Bolando devantdiz sires des proudomes devant nommez loe et outroie ceste vendue loialment et à bone foy ansi que dessus est devisée En tesmoignaige de ceste chose à nostre priere et à nostre requeste et à la priere et à la requeste dou devantdit Guyon chevalier de Bolando nostre signour li abbes de Buillon a mis son seal pendant en ces presentes lettres Ce fut fait l'an de l'incarnation Nostre Signour qui corroit par mil CC et cinquante et nuef ou mois de septembre