Charter Document - 02220378
| Charter Number: | 02220378 |
|---|---|
| Cartulary Title: | Cartulaire de Hugues de Chalon (1220-1319) |
| Charter Language: | French |
| Charter Origin: | Lay |
| Charter Type(s): | Purchase |
| Date: | 1272 |
| Date type: | Internal, A.D., Feast |
| Resource Link(s): |
Patrimoine numérisé de Besançon - MS Droz 21 - Tome 1 (p.867) |
Charter:
Je Perrins de Mellanz fiz Wuillaume Laille de Mellans fais savoir à touz que pour moy et pour les miens pour lesquex je enloy moy et mes biens de porter garandie pour moy et pour eaus de ce que je fais la siexte partie que je ay de partaige en la terre qui est apellée la terre et li prel de Mellans assise entre Monmaour et Deserviler environ les Amboteours et la siexte partie dou siexte que je ay et doy avoir es Ambotours et ce que je doy avoir pour raison doudit partaige et en autre maniere dois Monmaour tanque à Deserviler en prel en bois en terre arable en sieges de molins en diesmes et en autres choses ay vendu pour moy et pour les miens à la noble dame Lore çay en arriers fame le noble baron Jehan conte de Bourgoigne et seignour de Salins pour siex livres de viennois lesquex je ay receu de li en bons deniers nombrez tornez en mon profit et desques je me tieng pour bien paiés En tesmoignaige de ceste chose à ma priere et à ma requeste li chapistre de Saint Michiel de Salins a mis son seal pendant en ces lettres qui furent faites le jour de l'exaltation sainte Croiz l'an Nostre Signour MCC sexante et douze