Charter Document - 02220370

Nous Renaut et Hugonins freres fiz çay en arriers mons Hugon dit Put de Levier chevaliers faisons savoir à touz que nos non deceu non contraint ne par force ne par barat ne par paour ne par prieres mais de nostre bone volunté pour noz propres besoignes despagier avons vendu vendons baillons quittons et outroions permaignablement et senz jamais rapeler à noble donzeal Jehan de Chalon signour d'Allay toutes ces choses qui sont cy dessouz escriptes lesques nous recoignoissons en bone verité estre dou fié lige doudit Jehan premierement le prel de la Meserance où il a sept septures le prel d'essart Refin où il a treze septures le prel de Cuignet où il a doues septures le prel de la Coste de cinc setures le prel de la Chate de cinc septures le prel Bernart de trois septures le prel de Tendon de sept septures le prel de la combe Formal de cinc septures en la Sauce dous jornax de terre arable en l'Emboteour trois jornax de terre arable en la Recorbe doux jornax en la Haute Roye quatre jornaux en la [laissé en blanc] de Toillon quatre jornaux en la Benory un jornal en la vy dou Molin trois jornaux es Rotes un jornal dessus la grange à Chestelain un jornal es Planches de la vy de Salins doux jornaux le tier dou four dou Carrauge ou chausal qui est devant chiez Aubert on autre chesal qui est après chiez Girart le Clerc et on autre chasal qui est après chiez Richart le Grocel Jaquet de Levier et Girart fiz Robert de Levier qui estoient nostre homes et ont maisons chesaux et chenevieres Et toutes ces choses dessusdites avons nous vendues et quittées audit Jehan pour vint et cinc livres d'estevenens bons et loiaux et pour doues charges de sal laquel some nous avons heu et receu doudit Jehan en bons deniers nombrez et ladite sal assi et nous en tegnons pour bien paiez et en quittons ledit Jehan et les suens pour nous et pour les noz Et est à savoir que en ces devantdites choses vendues tiegnent li dui homes devantdit Jaquet et Girars dix et huit septures de prez et six jornax de terre et le siexte doudit four dou Carroge En tesmoignaige de laquel chose nous li devantdiz Renaut et Hugonins vendours avons requis et fait metre en ces presentes lettres le seal de l'onorable chapitre de Saint Michiel de Salins Ce fut fait le sambadi devant la Magdelene l'an de l'incarnation Nostre Signour qui corroit par mil CC sexante et seze