Charter Document - 02220369

Je Perrins de Santens escuiers fais savoir à touz que je vent baille et quitte et delivre à la noble dame Lore la moitié dou four de Levier qui siet sus la fontaine et trois septures de prel en Belcham et Richart dit Grance de Levier et son meis et à Refranche un bichet de froment et ouit souz desquies Vuillemin le fiz Paris et li siens sunt rendant chescun anz à la saint Martin d'yver et seze septures de prel desquex les sept septures sient en la Tille et les cinc en essart Ruffin et les doues enson le cham à la Geline et les autres doues septures en la Coste et Evrar et Calabrier et lour meis et Robert de Douve et ses enfanz et lour mès et quanque je oi et puis avoir ne doi à Levier et ou terretoire de Levier en homes en cham en prel et en toutes autres choses en quelque maniere que je les y aie pour cinquante livres d'estevenans lesquex je ay heu et receu de ladite dame en bons deniers nombrez tornez en mon profiz et desquex je me tien pour bien paié En tesmoignaige de ceste chose à ma priere et à ma requeste li religious hons et honestes li abbes de Rosieres et li priour de Chestel sus Salins ont mis lours seaux pendant en ces lettres Ce fut fait le jour de la saint Mathé l'an Nostre Seignour qui corroit par mil CC septante et quatre