Charter Document - 02220366

Je Perrins fiz mons Humbert çay en arriers dit de Ceys chevaliers fais savoir à touz ces qui verront ces lettres que tel droit et tel raison con je et Philippes mes freres hoirs doudit Hombert aviens ou puy de Monmaour à part nostredit pere ensi come lidiz puys giete hyaue est venuz en la partie doudit Philippe mon frere senz partie de moy pour faire sa volunté aut et bas par la partie que fait avons je et lidiz Philippes mes freres des biens que demoré nous sunt de nostredit pere et ai quitté et outroié senz reclain audit Philippe mon frere enterainement tel droit et tel raison que je pooie et devoie avoir oudit puy de Monmaour ainsi come il gieste aigue pour faire sa volunté Et en tesmoing de ceste chose à ma priere et à ma requeste Emarriz abbes de Monbenoit et Vuachiers abbes de Goile de l'ordre de saint Augustin de la dyocise de Besençon ont mis lours seaux pendant en ces lettres Ce fut fait le mecredi devant feste saint Pierre et saint Poul l'an Nostre Seignour qui corroit par mil dous cenz sexante et doux