Charter Document - 02220364

Je Hombers de Chapoy chevaliers fais savoir à touz que je ay vendu outroié quitté et baillié à noble baron Jehan conte de Bourgoigne et signour de Salins quanque je avoie devoie ou pooie avoir en tout le puy de Monmaour en terre et ou pendant c'est à savoir la tierce partie dou quart de la moitié pour quarante livres d'estevenens lesquex je ai receu doudit conte plainement en bons et loials deniers nombrez et en ay promis audit conte à garantir ladite vendue à droit contre toutes genz Et est à savoir que je ai promis et doi tenir doudit conte sexante soudées de rente assises à Nan lesques je doi faire de mon alue et ai promis audit conte faire maison à Monmaour et faire la garde par quarante jour oudit chestel et ce ai je juré à tenir et à garder per mon soirement et doudit fié suiz entrez en l'omaige à la noble dame Lore contesse de Bourgoigne et dame de Salins per la volunté et per le comandement doudit conte En tesmoignaige de laquel chose à ma priere et à ma requeste li chapitres de Saint Michiel et de Saint Moris de Salins ont mis lour seaux pendant en ces presentes lettres Ce fut fait l'an de l'incarnation Nostre Signour qui corroit par mil CC sexante et doux le vanredi après feste saint George