Charter Document - 02220362

Je Jaiques de Pontallié chenoines de Saint Anathoile de Salins curez de Cernans fais savoir à touz que je pour mes besoignes despaigier de ma propre volunté non mie contrainz ai vendu quitté bailliez et delivrez à la noble dame Lore contesse de Burgoigne et dame de Salins la cinte partie dou sixte dou peaige de Joigne et tout le droit que je ay et puis avoir et reclamer oudit peaige pour nuef livres dix souz d'estevenens lesquex j'ai receu de ladite Lore contesse en bone pecune nombrée et desquex je me tieng pour paiez entierement Et ay promis à ladite contesse à bone foy garantir contre toutes genz en droit ladite vendue Et cum messires Estienes de Bannens et messire Ferriz chevaliers freres mi coigsins aient vendu à ladite contesse la siexte partie doudit peaige je ladite vendue lou outroy et consent et tout le droit que je avoie oudit siexte quite et outroi à ladite contesse et promet en bone foy que je ne vanray encontre ne par moy ne par autre Et en tesmoignaige de ceste chose j'ay mis mon seal pendant en ces lettres et en plus grant tesmoignaige de verité à ma priere et à ma requeste li chapitres de Saint Anathoile et de Saint Michiel de Salins i ont mis lours seaux pendant ensamble le mien Ce fut fait le mardi devant la Magdeloyne l'an Nostre Signour qui corroit per mil deux cenz sexante et sept