Charter Document - 02220358

Je Richars de Mombeliart sires de Monfort fais savoir à ces qui verront ces lettres que je non mie contrainz de ma bonne volonté et pour mes besoignes que eschiver ne pooie despagier ay vendu et quitté à noble baron Jehan conte de Bourgoigne et signour de Salins mon signour et mon uncle quanque je avoie et pooie avoir en demeneure et en fyé et en autre maniere ou puy de Monmaour et quanque messires Guillaumes de Ceys et Humbelins et Jacquet fiz çay en arriers mons Vauchier de Claron Jehans et Jacquet fiz çay en arriers mons Jacon de Clairon et li lour avoient ausi ou puy de Monmaour par ansi come il giete aigue par devers Desserviler et par devers l'abergement de Falouse c'est à savoir tanque à sexante toises de long à la toise doudit conte dois les murs dou borc de Monmaour en aval pour quatre cenz livres d'estevenans que reçui en ay doudit conte en bone pecune nombrée tornée en mon profit abrenunceant Et en tesmoignaige de ce j'ay mis mon seal pendant en ces lettres et en plus grant tesmoignaige de verté j'ay prié à honorable et discret honme à l'official de Besençon que le seal de la cour de Besençon meist en ces lettres ensamble le mien Ce fut fait l'an de l'incarnation Nostre Signour qui corroit par mil dous cenz sexante et sept ou mois de may