Charter Document - 02220355

Je Hombers et je Haymonins escuiers de Mellanz faisons savoir à ces qui verront ces lettres que les doues parties que nous avons de partaige en la terre qui est apelée la terre et li prel de Mellanz assise entre Monmaour et Deserviler environ les Ambotors et le siege de un molin que nos avons esdiz Ambotours et ce que nous avons et poons avoir por raison doudit partaige et en autre maniere dois Monmaour tanque à Deserviler en prel en bois en terre arable en sieges de molins en diesmes et en autres choses avons vendu à noble baron Jehan conte de Burgoingne et signour de Salins pour trente et cinc livres d'estevenens lesquex nous avons receu de luy en pecune nombrée tornée en nostre profit et desquex nous nos tenons plainierement pour paié abrenunçant recognossant en nostre loialté que lesdites choses vendues ne tegniens de fié ne à cens d'ome né Et se acuns se traoit avant que riens chalonjast esdites choses por fié ou por cens et garantir ne les puissons rasonablement pour ce qui ataint en seroit enloyons en la main doudit conte ce que nous avons à Mellanz Et sumes devenuz homes lieges ledit conte save la feauté le signour de Ceys et avons pris doudit conte en fié ligement tel droit et tel raison que nous aviens et poiens avoir ou pou de Cremont et tel droit que nous aviens en la vile de Mellant et es appendises c'est à savoir es costumes et es droitures de ladite vile et li cuens nous a promis loiaument et à bone foy maintenir et garantir contre ses homes En tesmoignaige de ce à la priere et à la requeste doudit conte et de nous li chapitres de Saint Anathoile de Saint Michiel et de Saint Morise de Salins ont mis lour seaux pendant en cex lettres Ce fut fait ou mois de juin l'an Nostre Signour qui corroit par mil CC cinquante et nuef