Charter Document - 02220354

Nous Othes cuens palazins de Burgoigne et sires de Salins et nous Jehans cuens d'Auçuere Estienes sires de Waignorriz et Jehans de Chalon sires d'Allay faisons savoir à touz que nous par bone compaignie et loial à bone foy nous sumes acompaigniez et acoilliz et à ce expressement nous sumes acordez et consentiz que nous conquerrons à nostre oex et à nostre profit à miés que nous porrons et verrons que nostre profit sera ou par achat ou par eschange ou en autre maniere le puis et la muyre qui est à Salins ou bourc le conte de Bourgoingne ensamble les fonz et les partenances doudit puis Et avons volu et voluns et à ce nous accordons tout expressement que se nous conquerrons ledit puis et la muyre en tout ou en partie les rentes la signorie et la proprieté de ce que conquis en sera par lequel de nous que ce soit doivent estre parties et devisées entre nous et nostres hoirs en ceste maniere c'est à savoir que nous Othes cuens palatins de Bourgoigne devantdiz devons paier la tierce partie de ce que ledit puis et la muyre costera à conquerir soit par achat ou par eschange ou en autre maniere et devons avoir la tierce partie des rentes de la signorie et de la proprieté et nous lidiz Jehans cuens d'Açuerre et Estienes sires de Waignoriz devons ausi avoir la tierce partie des rentes de la signorie et de la proprieté et devons paier la tierce partie de ce qu'il costera à conquerir soit par achat ou par eschange ou par autre maniere et nous lidiz Jehans sires d'Arlay devons avoir la tierce partie des rentes de la signorie et de la proprieté doudit puis et devons paier la tierce partie de ce qu'il costera à conquerir soit par achat ou par eschange ou par autre maniere Et avons acordé entre nous et acordons et à ce expressement nous consentons tuit ensamble que de cest conquest en tout ou en partie quant fait sara doudit puis ou de la muyre partions tout ensanble ou par les trois ou par les dous ou par li uns de nous tuit devons estre compaignons et parceniers doudit conquest et paier et panre per ansi come dessus est devisez Et se ansi estoit que acuns de nous avoit proprieté fyé ou autre droit oudit puis et en la muyre il en doit panre des autres eschange en autres fiés ou en autres rentes qui soffisant saroient à regart de proudomes Et entre nous sumes à ce acordés et acordons que se nous tuit ensamble ou li trois ou li duy ou li uns de nous façoit nuls conquest doudit puis et de la muire en tout ou en partie et se acuns ne voloit ou pooit paier sa partie que li afferroit à paier doudit conquest les rentes et les yssues que cil que ne paieroit ou ne voudroit paier a ou puis dou bourc de Salins communal es hoirs le conte de Chalon Jehan sunt obligiez à celui qui les conquest auroit fait tanque il eust paiez desdites yssues ce qui afferroit à paier doudit conquest à celui qui paié en auroit et ladite partie paié lesdites yssues restornent quites à celui cui elles sont Et toutes ces choses dessusdites et devisées nous lidiz Othes cuens palatins de Burgoingne Jehans cuens d'Açuere Estienes sires de Vaignorriz et Jehans de Chalon sires d'Allay avons promis et promettons li uns à l'autre per sollempnel stipulacion et par nostres soirement doné sus sains evangiles garder et tenir fermement senz corrumpre et que nous barat cautele ne destorbiers ne ferons procurerons ne machinerons en apart ne en rescondu per quoy ceste compaignie acoillie et acordée et les covenances dessusdites ou acune d'icelles puisse estre corrompue destorbée ou empachié en tout ou en partie en tens à venir et eschangez ou achat se fait est oudit conquest farons bien et loialment ausi por l'un come por l'autre ensi con dessus est devisez En tesmoignaige de laquel chose nous lidiz Othes cuens palatins de Bourgoingne Jehans cuens d'Aceurre Estienes sires de Vaignoriz et Jehans de Chalon sires d'Allay avons mis noz seaux pendant en ces presentes lettres faites et donées ou mois de decembre l'an Nostre Signour corrant par mil CC et nonante