Charter Document - 02220353

Je Perrins dou Layc Dan Watier dit Dou Prey fais savoir à touz que je par bon consoil et franche volunté senz force senz aucun controignement ay vendu pour mon profit permaignablement à noble baron à mons de Chalon signour d'Allay pour sexante sous d'estevenans paié à moy entierement en pecune nombrée de part ledit baron tornée et mis[e] en mon profit quanque je avoie et pooie et devoie avoir dedenz ces boines cy après descriptes c'est à savoir dois la saingne de Aute Jour jusques à grant Cernois dou lay et de Malpas et de La Planée et dois ledit Cernois jusques es croiz dou Myrour et dois lesdites croiz tanque à grant chemin Et de totes ces choses vendues je me suis devestu pour moy et pour mes hoirs et en ay envestu ledit monsignour Jeham pour lui et pour ses hoirs par la main Vauchier de Fraigne son maire dou Mytabiez En tesmoignaige de verté je ay requis le religious abbé dou Mont Sainte Marie qu'il mette son seal en ces lettres Ce fut fait l'endemain de l'invencion saint Estene en l'an Nostre Signour mil dous cenz octante et trois