Charter Document - 02220352

Je Jehannins de Meges fiz çay en arriers mons Perron de cel maisme leu chevaliers fay savoir à touz que je pour mon evidant profit non decehu non contraint ay vendu et quitté permaignablement pour moy et pour les hoirs mons Hombert mon frere çay en arriers chevalier c'est à savoir Simonin Jehannin Oudet et Estevenet mes nevours tout ce que je et muydiz nevours poons et devons avoir en champs en prel en cultil en chenevieres et especialment tout ce que nous avons et poons avoir en la vile de Myeges c'est à savoir dois la chacié dou Viez estant de Miges venant per devant la maison à la Pelleteire tanque à mostier de Miges et dois ledit mostier tanque à champ qui est apelez champ de l'Espine et dois ledit champ tanque à l'aigue de l'estant dessusdit à noble baron Jehan de Chalon signour d'Allay et à ses hoirs pour trente et trois livres d'estevenois bons et loiaux lesquex je ai eu et receu doudit Jehan en bons deniers nombrez En tesmoing de laquel chose j'ay requis et fait mettre en ces lettres le seal le noble baron mons Gauchier chevalier signour de Chestelvilain Ce fut fait et doné en l'an de Nostre Signour corrant par mil CC octante et un ou mois d'octouvre