Charter Document - 02220350

Je Perrins de Meges escuiers fiz çay en arriers mons Perron de Meges chevaliers fais savoir à touz que je non mie decehu ne baratez mais de franche volunté por nos besoignes propres ai vendu vende done et outroie et delivre en nom de pure et parfaite vendue senz rapeler à noble baron Jehan de Chalon signour d'Allay quanque je ay puis et doi avoir en quelque maniere que ce soit en la ville de Mieges qui est enclos en ces termes c'est à savoir dois la fontaine qui est devant la maison es Marches tanque à la fontaine qui est apelée Toillon de Perrier et dois ledit Toillon tanque à la fontaine qui est apelée fontaine de Rambert et dois cel leu tanque à la fontaine de Chamfort et dois celui leu tanque à la fontaine qui est apelée fontaine de l'Espine tanque à l'aigue dou Viez estant et quanque iet encloz esdiz termes dois ladicte aigue dou Viez estant tanque à mostier de Meges em prel en chans en chasaus en chenevieres en curtiz et en autres choses pour quinze livres d'estevenans lesquex j'ai heu et receu en deniers nombré En tesmoignaige de ceste chose je lidiz Perrins ay requis et fait metre en ces presentes lettres les seaulx de religious homes frere Jaique abbé dou Mont Sainte Marie de l'ordre de Cyteal et de mons Boduin abbé de Goyle de l'ordre saint Agustin Faites et données l'an Nostre Signour mil dous cenz octante et on ou mois de juillet