Charter Document - 02220349

Je Ponçarz çay en arriers fiz Nicolet de Meges et je Biatrix sa fame faisons savoir à touz que nos avons vendu quitté doné et outroié permaignablement senz jemais rapeler à la noble dame Lore fame çay en arriers le noble baron Jehan conte de Burgoigne et signour de Salins cinc cherruies que nos avions es corvées dou vaul de Meges et li avons vendu et quité le plus se nous li avons esdites corvées li [et] à ses hoirs et quanque nous y poons ne devons jemais reclamer ne nous ne nostre hoirs por doze livres de viennois desquelx nous sumes bien paiez de la devantdite dame en bons deniers nombrez Et avons covent à ladicte dame devant nommée par nostre foy corporelment que nous li garandirons la vendue dessus nommée en bonne foi contre toutes genz et en touz leus En tesmoignaige de laquel chose nous Girars humiles priours de Meges avons mis nostre seal pendant en ces presentes lettres à la priere et à la requeste de Poinçart et de Byatris dessus nomez Ce fut fait l'an Nostre Seignour qui corroit par mil dous cenz septante et cinc ou mois d'aost