Charter Document - 02220339

Je Jehans sires de Jou damoiseal fais savoir à touz que je non mie deceu ne contrainz mais de ma bone volunté et por mon profit evidant presenz et à venir ay volu et wis donois outrois et quittois en meniere et en vendue perpetuel pour moy et pour mes hoirs à noble baron et saige mon bien amé signour mons Jehan de Chalon signour d'Allay pour luy et pour ses hoirs pour le pris de deux cenz livres de monoie corsable lesquex je ay eues et receues doudit mons Jeham et tornées en mon profit c'est à savoir toute la poiz que sera coilluite et faite toutes les années çay en avant en touz les bois et en tous les jouz qui sunt de toute ma juridicion et de toute ma signorie c'est à savoir dois Jou le chestel de La Cluse Doyes de Douz des Fours de Valtraver et de touz autres leus qui sunt ou porroient estre de mon propre domainne saul mon droit et ma signorie des bois telx que je les y avoie devant la foicture de ces lettres Et ne puet estre vendue ne delivrée ladite poiz à nulle persone qui soit tanque alle soit deschergié une foiz en l'année à chaufal dou chastel de Jouz ou en la ville de Dou et quant alle sera deschergié cil cui la poiz sera le doit faire savoir à messaige doudit mons Jehan de Chalon qui à recoillir ladicte poiz sera estaubliz Et après ce que il li iert fait savoir li poiz doit anqui demorer huit jours continuel senz vendre ne delivrer à nulle persone se ce n'estoit audit mons Jeham de Chalon ou à son comandement Et est à savoir se lidiz messires Jehan ou ses comandement la wet avoir il la doit avoir et panre senz nul contredit ne de moy ne d'autruy en tel meniere que il doit paier pour le cenz pesant de la poiz blanche cinc souz de monée corsable et pour le cenz pesant de poiz noire six souz et non plus et pour celui pris il doit avoir toute la poiz qui sera dores en avant coillite et faite en toute ma signorie selon la menoe dessusdicte Et les huit jours passez après ce que il l'auront fait à savoir li marchianz et cil cui li poiz seroit en porroient et devroient faire lour volunté senz nul contredit dudit mons de Chalon et autrement non Et est à entendre que lidiz messire Jehan de Chalon et li suens puent ce faire toutes les années qui sont à venir à touzjours mais et à une chescune année ansi cum elles ensuigront et se il tout ne le façoit une des années que pour ce moins sa possession ne li fut troblée que il ne la pooit faire l'autre senz nul contredit Et si ansi estoit que aucuns de mes genz ou autres emportoient ladite poiz fuers dou leu ou vendoient à autruy devant ledit terme je vuil et outroy que lidiz messires Jehans ou ses comandement la puisse panre et avoir senz riens paer et je sus ce qu'il auroient ce fait panroe mon maillour selon ce que y aferroit Et de ce faire je done plain pooir audit mons Jehan de Chalon et l'en met en possession par la tradicion de ces lettres et li promet pour lui et pour ses hoirs pour moy et pour les miens garder et tenir fermement toutes ces convenances ansi come elles sunt dessus escriptes senz jemais venir encontre par moy ne par autruy et en obligois moy et mes hoirs per mon soirement doné sus sainz euvangiles et sus l'obligacion de touz mes biens muebles et non muebles presenz et à venir De ces de Pontallié des Boschages et de ces qui sunt de ma justice qui ne sunt en mon propre domaine promet je pour moy et pour mes hoirs procurer et porchacier à mon leal pooir selon raison coment de lours lidiz messire Jehan ou sui hoirs aient la poiz por [tel] pris et por tel condicion cum il [est] dessus diz et devisé de ces de [mon] propre domaine Et renonçois en cest fait per mon soirement devant doné à toutes exceptions et à toutes raisons de fait et de droit qui moy et es miens porroient aidier à venir contre la tenour de ces lettres et oudit mons Jehan nuire En tesmoignaige de laquel chose j'ay bailliés ces lettres audit mons Jehan de Chalon seelées de mon seal et à plus grant surté j'ay proié et requis à religiouses persones et honestes frere Jaique par la grace de Deu abbé dou Mont Sainte Marie et frere Guillaume par la grace de Dex abbé de Balerne de la diocese de Besençon de l'ordre de Citel que il metent lour seax en ces presentes lettres avec le mien seal Faites et données le vanredi devant Pasques flories l'an Nostre Signour corrant mil CC nonante et nuef le premier jour d'avril