Charter Document - 02220338

Je Guillaumes dit de Trenay chevaliers fays savoir à touz que je non mie deceu ne par barat ne par force menez mais de ma propre volunté ay vendu et ven à touzjours mais à noble baron Jehan de Chalon signour d'Allay et es suens mon bois qui est appelez Champ Lierry liquel bois siet selon le meis monsignour Jofroy de La Rive d'une part et selon le bois mons Odon d'Allay Estevenin de Ruffey et ces de Cherrin d'autre part et mon estanc de Lamestez et [l]es Boxcheroux et lour tegnement et toutes les appertenances doudit bois et mon bois qui est appelez les Chammes liquel bois siet selon le bois adit mons Jofroy d'une part et selon le bois de Valone d'autre part et generalment quanque je ay et puis et doy avoir en quelque maniere que ce soit dois la ville de Coge tanque Allay en bois en champ en terres en homes et en toutes autres choses saul une piece de terre qui siet en Lameste et part à Hugue Dessus Les Autres liquel piece de terre est dou fié audit Jehan de Chalon et saul le fié que Odon de Blaterens tient de moy et saul ce que j'ay ou dyeme de Blaterens laquel piece de terre dessusdite le fié et le dyeme je retien en ceste vendue à moy et es miens Et ay vendu audit Jehan de Chalon les choses dessusdites pour trois cenz et quarante livres d'estevenans bons et loiaux lesquex j'ai heu et receu doudit Jehan de Chalon en nom de pris en bons deniers nombrez et m'en tieng pour bien paiez En tesmoignaige de laquel chose j'ay fay seler ceste presente lettre dou seal de l'onorable chapitre de l'iglise Saint Anatoile de Salins Doné à Salins l'an de grace corrant par mil CC et octante ou mois d'octembre