Charter Document - 02220336

Je Henry diz de Blaterens fiz çay en arriers Richart chestelain de Bleterens fais savoir à cex qui verront ces presentes lettres que con li nobles bers Jehans cuens de Burgoigne et sires de Salins me eut doné à ma vie soulement sa fort maison de Blaterens je non mie contrainz de mon expoigne gré et de ma bone volunté quite et done en eschange audit conte mon signour ladite fort maison de Bleterens pour les molins que il a à Blaterens devant ladite fort maison lesquex doné m'a pour ladite maison fort à avoir et tenir à ma vie et après mon decepx retorneront lidiz molins audit conte mon signour ou à ses hoirs franchement et quitement Et en tesmoignaige de ce à ma priere et à ma requeste Guillaumes dyens de Lons a mis son seal pendant en ces lettres Ce fut fait le sambadi pruchain après Pasques l'an Nostre Signour qui corroit par mil CC sexante et cinc