Charter Document - 02220331

Je Estevenins fiz çay en arriers Renaut dou Loveret fais savoir à touz ces qui verront ces presentes lettres que par ma bone volunté et par mon prouaige non mie contrainz et en mon bon senz par le lous et par le consentement de Alis ma feme vendi outroiay et quitay à touzjours mais à noble baron Jehan dit de Chalon signour d'Allay tout quanque je avoie adonques ou terrage de Plainosel et de Jonnay c'est à savoir en terres en bois en prel et en vignes en censes et en autres rentes et en toutes autres choses pour le pris de quarante livres d'estevenens lesquex j'ay receu dou devantdit Jehan en bons deniers nombré et m'en tien por paié c'est à savoir especialment le quart dou prel de Praelle item le pré de Lesmies qui siet entre le biez d'une part et le pré à ma suer d'autre item une piece de terre en Leschiere qui siet entre le biez de les Marches d'une part et la terre à Cat d'autre item une piece de terre qui siet en Gran Prel dessouz la terre mons Hugue de Fescheu d'une part et la terre Gauteres d'autre item la moie partie des vignes de Hyz c'est à savoir la moitié item une vigne qui siet es vignes de Hyez desoz les vignes dites dou Tremple qui sunt Jehan de Chalon d'une part et dessus la vigne à Chat et Willet d'autre item une piece de terre qui siet ou pendant dou mont Jovasey entre la terre Jehan de Jonnay d'une part et Crestenet Gayet d'autre item un curtiz qui siet en Jonnay entre la terre Morin d'une part et la terre Vincent d'autre item une piece de terre qui siet en la Combe entre la terre Jehan de Jonnay d'une part et d'autre et contorne sus Vuinet Micot item le bois de Aut tertre item la vigne dite de Teles item la terre qui siet dessus la vigne es enfanz Jehannet de Montain item doux quartax aveine et doues gelines sus le bois et la terre à la Chaderete item le champ et les vignes qui sunt desoz les vignes de Novelois lesquex sunt audit Jehan de Chalon d'une part et sus le champ Juhan Chestelain de L'Estoille d'autre item le quart de ce que je avoie baillié es enfan au Rey item tout ce que je avoie en Rochebois item le champ dou Lanceour qui siet entre la terre Jehan de Jonnay d'une part et d'autre item une piece de terre ou Moncel qui siet dessus la terre es Gormons d'une part et le champ Jehan Chestelain de L'Estoille d'autre item le champ de l'Abespin qui siet entre la terre Morin d'une part et la terre Jehan de Jonnay d'autre item les essars et les bois des Fagieres qui sient entre le bois de la Goute d'une part et la cherriere d'autre et quanque je avoie dois l'estan de Plainnoisel et les murgiers de Malen et le mostier de Chavoirey les estanz de Chavoiré devers L'Estoille Et toutes cex choses je lidiz Estevenins tenoie franchement En tesmoignaige de lesques choses je lidiz Estevenins ay fait mettre en cex presentes lettres le seal dou religious home et honorable mons Pierre [priour] de Lons et le seel mons Guillaume dyen de ce meisme leu Ce fut fait et doné l'an de l'incarnacion Nostre Seignour qui corroit par mil doux cenz octante et un ou mois de janvier