Charter Document - 02220328

Je Hugues de La Saule chevaliers fais savoir à touz que je en recompensacion des biens et des servises que li nobles bers messires Jehans de Chalon sires d'Allay mes bien amez sires et redoté a fait à moy et es miens et fera encores et especialment pour don de vinz livres d'estevenans lesquex je lidiz Hugues ai eues et receues de lui en bons deniers nombré ay doné quité et outroié pour moy et pour les miens permaignablement adit noble baron mons Jeham de Chalon et à ses hoirs le mais Jehan et Martin freres enfan çay en arriers Perron le Bastar de Sancenenz ensamble toutes les appendises d'yceluy en quelque maniere que lidiz mais s'estende soit en champ ou em pré en homes en curtil en pescheries en cour d'aigues en terres arables et non arables et en toutes autres choses qui apendent adit meix et puent appartenir et doivent et touz autres droit que je avoir y puis ou doy en justice et en signorie ne je ne mui hoir liquex maix soloit partir à monsignour Pierre de Conteit chevalier Pour quoy dou devantdit maix je me suis devestu renonçant En tesmoignaige de laquel chose je lidiz Hugues de La Saule ay requis les seaux de religiouses persones et honestes frere Rogier humile priour de Laons le Saunier et de frere Hombert humile priour de L'Estoille estre posez en cex presentes lettres Faites l'an de grace corrant par mil CC et nonante ou mois de septembre