Charter Document - 02220324

Nous Freriz chevaliers et sires de Morpré et Nycole sa femme faisons savoir à touz que nos anduy ensamble et chescun par soy pour noz besoignes faire et espagier de nostre bone volunté senz coaction vendons por nos et por noz hoirs et en nom de pure et parfaite vendue baillons quitons et outroions permaignablement senz jemais rapeler à mons Jehan de Loherainne chapelain le noble baron mons Jehan de Chalon signour d'Allay et es suens ou à celui qui outroier le vouroit le fié que de nous tient Jehan escuiers de Poloingny fiz çay en arriers mons Henry de Morpré chevalier ou vaul de Meges ensamble tout droit toute raison et toute signorie que à nous ou à chescun de nous apartient oudit fié et es apertenances doudit fié c'est à savoir en corvées panre sus les homes doudit fié en cherroy en emendes en justice en costumes et en toutes autres choses en quelque maniere que nos les y aions ou aons acustumé de panre Et ces choses nous vendons adit Jehan de Loherainne pour le pris de quarante livres d'estevenans lesquex nous avons eu et receu de luy à tens de ceste vendue en bons deniers bien nombré desquex nous nous tegnons parfaitement à paiez Et de ces choses vendues nous nous devestons promettans Et prometons encores nos lidiz messire Freriz et Nicole adit Jeham achetour louer et faire seler devant Pasques pruchainement venant des seaux des chapitres Saint Anatoile et Saint Michiel de Salins chartre sus la matiere de la vendicion dessusdite en la forme qu'il li semblera que miex vaille pour luy En tesmoignaige de laquel chose nos messires Freriz et dame Nycole avons requis et fait seeler ces lettres des seaux maistre Hugue de Blaterens bailliz à ce temps de noble baron mons Jehan de Chalon signour d'Allay mons Perron priour de Meges et mons Girar dien de Montaigne et curé de Meges Faites et donées en l'an corrant par mil doux cenz nonante et siex ou mois de marc