Charter Document - 02220323

Je Hugues diz Groz de Salins chevaliers fais savoir à cex qui verront ces presentes lettres que non mie contrainz ay vendu et quité à noble baron Jehan conte de Bourgoigne et signour de Salins pour vint sous d'estevenans que j'ay eu et receu de luy en bone pecune nombrée tournée en mon profiz et desquex je me tien pour bien paié trois deniers que je avoie de cens sur le siste de un meis assis ou vergier qui fut Huguenat çay en arriers fiz dan Wiet entre la saunerie et la maison doudit conte et trois deniers que messires Pierres çay en arriers mes freres avoit de cens sus le siste doudit meis et celx leus come y m'aferoit pour la vendue doudit leu que le cens devoit que lidiz contes a acheté abrenuncianz et ay promis En tesmoignaige de laquel chose pour ce que seal n'avoie li religious hons Vauchiers abbes de Goile à ma priere et à ma requeste a mis son seel pendant en cex lettres Ce fut fait l'uictive de feste saint Mathé l'apostre l'an Nostre Signour qui corroit par mil doux cenz sexante et siex