Charter Document - 02220322
| Charter Number: | 02220322 |
|---|---|
| Cartulary Title: | Cartulaire de Hugues de Chalon (1220-1319) |
| Charter Language: | French |
| Charter Origin: | Lay |
| Charter Type(s): | Purchase |
| Date: | 1278 |
| Date type: | Internal, Feast |
| Resource Link(s): |
Patrimoine numérisé de Besançon - MS Droz 21 - Tome 1 (p.715) |
Charter:
Je Perrins de Sentens escuiers fays savoir à touz que je ven et ai vendu quité baillié et delivré à touzjours mais à noble damoisel Jehan de Chalon signour d'Allay mon signour tout quanque j'ay puis et doi avoir ou vaul d'Arbois en quelque maniere que ce soit especialment tout quanque j'ay ou leu que l'on appelle Verron en vins en vignes en deniers en blef en ouille en foaige en terres arables et non arables en bois en cens en costumes et en demeneures et en toutes autres choses en quelque maniere qu'elles soient pour le pris de quinze livres d'estevenans bailliés et delivrées à moi entierement en bons deniers nombré Lequex choses devantdites toutes ensamble et une chescune par li je cognois tenir en fié doudit monsignour Jehan et me deveste des choses devantdites et promet En tesmoignaige de verté je ai requis et fait metre en ces lettres le seaul de la court du contey de Bourgoigne que furent seignées par la main Pierre de Moilloy en la presence Girart de Monbosum le jour de feste saint Clement l'an mil CC septante et huit