Charter Document - 02220321

Je Alardet de Quyntegny diz de La Roche fay savoir à touz que je en recompensacion des bienfait et de cortoisie que li nobles bers messires Jehans de Chalon sires d'Allay a fait à moi et es miens et fera encores et especialment pour dons que il m'a fait de nuef livres d'estevenans lesquex je lidiz Alardez ay heues et recehues de lui en bons deniers nombré ay doné quité et outroié permaignablement pour moy et pour les miens à devantdit noble baron monsignour Jehan de Chalon signour d'Allay mon bien amé et redoté signour et à ses hoirs premierement le tier dou diesme de la vigne de Froitcaul liquelle est à mon devantdit seignour le tier dou diesme de la vigne à Prieur qui siet en Froicoul le tier dou diesme de la vigne monsignour Hugue Gaulafin assise en Buesne le tier dou diesme de la vigne es enfan Odeit diz Leschet de L'Estoille liquelle siet en Buesne desoz ladite vigne le tierz dou diesme des terres arables que li homes de Plainnosel tiegnent dois le biez de Platenay tanque à l'orme de Quintegny c'est à savoir en vignes et en champs et en quelque diesme que lidiz Alardet ait droit ne raison et en la vigne Hugueneat d'Allay et en la vigne Ogiers de Joiens et en toutes autres vignes et choses assises en Buesne coment qu'elles seient nommées et appellées lesquies choses toutes dessus nommées soient specifiées en cex presentes lettres ou non specifiées je tenoie franchement Pour quoy de cex choses toutes devantdites je lidiz Alardez de La Roche me suis devesti et ay promis renonçanz En tesmoignaige de laquel chose je li devantdiz Alardez ay requis les seaux de religiouses persones et honestes freres Rogier humile priour de Lons et frere Hombert priour de L'Estoille estre pousé en ces presentes lettres Faites l'an Nostre Signour corrant par mil doux cenz et nonante ou mois de septembre