Charter Document - 02220320

Je Jehans de Lernay fiz çay en arriers Haymonet à Prevost de Lernay fay savoir à touz que je de ma bone volunté senz nulle cohaction en regardant mon grant profit ay vendu purement bailliez et delivré à noble baron monsignour Jehan de Chalon signour d'Allay et à ses hoirs permegnablement un sezieme lequel je avoie en Croisenz et en Bruil c'est à savoir en bois et en terres arables et non arables et en prel et en toutes autres choses coment qu'elles soient appelées pour le pris de huit livres d'estevenans lesquex je hay heu et recehu de lui en bons deniers nombré et m'en tien pour bien paiez desquex choses dessusdites je me suis devesti et promet et ai renuncié Por ce que je n'ay point de seel j'ay prié et requis religiouse persones et honestes frere Rogier humile priour de Lons le Saunier et frere Hombert humile priour de L'Estoille qu'il mettent lours seaux en ces presentes lettres en tesmoignaige de verté Ce fut fait et doné l'an Nostre Signour corrant par mil deux cenz quatre vinz et dix ou mois de juillet