Charter Document - 02220318

Nous li prevost et li chapitre de l'yglise de Saint Anathoile de Salins faisons savoir à touz que nous l'an Nostre Signour corrant par mil trois cenz et dous le mecredi après la Penthecoste en nostre chapitre general dou comon consentemant de tout le chapitre consideranz le commun profit de nostredite yglise avons laissy amosoné et accensi permaignablemant à noble baron et puissant monsignour Jehan de Chalon signour d'Allay et es siens les choses cy dessouz nommées c'est à savoir toute la terre ensamble touz le traffon que nous avons dois la maison à portier de la porte communal des mu[r]s de la ville que l'on dit la porte de Saint Anathoile tanque à Chestel Guyon soit en curtil en vigne en pereal ou en autre maniere quelle qu'elle soit et dou larges dois les boinnes que mises sunt par dessoz nos noiers de Saint Anatoile tanque es murs de la vile tochant à ladite terre item et en toute la terre que nos avons poons et devons avoir ou mont de nostredite yglise dessoz ledit Chestel Guyon tanque à chemin commun à la ligne de l'anglerie de la maison Hugue de Citeaux par devers Saint Jeham tanque au curtiz doudit monsignour Jehan ensamble les cens les terres et touz le droit que nous avons poons et devons avoir oudit curtiz mons Jeham en quelque maniere que ce soit qui est desoz ledit Chestel Guyon et dure tanque à curtiz es enfanz Jehannin à Roichaz par ansi come les boines que mises y sunt le monstrent et devisent Et ces choses dessusdites avons nous laissiez accensies et amosonées audit monsignour Jeham pour sept livres de monée corsable en la cité et en la dyocese de Besençon à paier et à rendre chescun an perpetuelment à nous ou à nostre certain comandement en deniers nombrez le jour de la invencion saint Estiene le martir lesquex sept livres lidiz messires Jehans nous a assises et assignées sus sa rente de la salnerie de Salins et sus lesdites choses que accensies et amosonées li avons Et per ansi nous nous sumes devesti desdites choses et ledit mons Jehan en avons envesti et mis en possession corporel ou assi par la tradicion de cex lettres et li promettons renunçanz En tesmoignaige de laquel chose nous li devantdist prevost et chapitre avons selés ces presentes lettres de noz seaux pendant et avons suppliez honorable persone et discrete l'official de la court de Besençon par l'apposicion de noz seaux que il mete le seaul de la court de Besançon en cex presentes lettres ensamble les noz seaux Ce fut fait et doné l'an et le jour desus dit