Charter Document - 02220315

Je Bietrix fille çay en arriers Girart diz Vuerre de Salins fay savoir à touz que je de ma bone volunté et de mon espoingne gref non mie deceue ne menée par force ne par boidie ne par paour ay vendu et ven et baille et outroi et quite permaignablement à noble dame Lore et à ses hoir un giste que j'ay et doy avoir chescun an en la ville de Fraigne que [doivent] Pierres Parains Estienes le fiz Richart à la Ponce Perronier et Autiers ses freres Perrete fille dan Lambert Challet Nicolier ses fiz Guillames li fiz à Fevre Savari li fiz Jorget Perrin ses freres de Dompierre Robelin Hugues ses frere Perret Girars Vauchiers Jehanz çay en arriers enfan à Brebençon Estenes [et] Renaut anfan Jaquemot Perret et Estenes çay en arriers enfanz Renaut Pollet Hugues ses nies Henry li fiz Girart Pallet Perret li fiz Richar Genoit ses frere Bertet li fiz Vuillet Besençon des Risses Hugonin Chevalier et Pierre Lia frere à Bée li enfanz Crestin de Fraigne Hugue freres oudit Crestin et autres genz de Fraigne Et li ai vendu avec quelques us quelque raison et quelle action que je ay et doy avoir et puis oudit gite ne por raison doudit gite ne contre ces cy dessus nommez ne encontre autres pour laquel vendue je hay heu et receu de ladite noble dame cenz et dix souz d'estevenans en bons deniers nombrez renunçant Et nous Marguerons Symonete Secille et Doucete serours à ladite Beatrix louons ladite vendue et nous y consentons et prometons par noz foy à ladicte dame noble que encontre ne vanrons par nous ne par autrui dois ores en avant ne consentirons que autres encontre viegne ne par fait ne par parole En tesmoignaige de ceste chose nous Bietrix Marguerons Symonete Secille et Doucete avons requis et fait metre en cex lettres le seal dou chapitre de Saint Michiel de Salins Ce fut fait l'an de l'Incarnation qui corroit par mil doux cenz septante trois le vanredi après feste saint Barnabé l'apostre