Charter Document - 02220312

Nous Vauchiers de Commerci sires de Chestelvilain et je Merguerite sa fame faisons savoir à touz que toutes les choses que acheté avions de Estevenin Ferroulle fil çay en arriers mons Hombert Ferroul et de Marguerite sa fame ou vaul de Meges non mie contrain pour noz propres besoignes despagier avons vendu et quité permanablement à la noble dame Lore contesse de Burgoigne et dame de Salins nostre dame pour cenz et dix livres d'estevenans bons et loiaux que eu et receu avons de li en bons deniers nombré tornez en nostre profit et don nous nous tenons pour bien paié c'est à savoir en Doys Vuienet et ses freres et Poncet lour frere et lour mès à Ungliers les enfanz Richart çay en arriers dit Rosiot et Jehannet nevour audit Richart et lour mès es Savillex Loys Martin sun uncle Jaquet et Perreal et lour mès liquex doivent pour lour mès un giste à seignour chescun an à Loncochon Perron Baraiz Estevenun Brannebois Estevenon Chalemont Estevenin fil Vuillaume Estevenet fiz Mergueier et Emagier et lour mès à Viler Le Bois un mès que l'on appelle le mès es Conniz et quanque de raison poiens et deviens avoir esdiz homes et en lour mès abrenunçant En tesmoignaige de ceste chose nous lidiz Vachiers avons mis nostre seel pendant en cex presentes lettres Et je ladicte Merguerite sa fame pour ce que seal n'avoie ay prié l'abbé de Balerne que son seal meist pour moy en ces lettres Ce fut fait le mardi après la feste saint Mathie l'apostre l'an de l'incarnation Nostre Signour qui corroit par mil et CC sexante et siex